Jumat Agung

ACARA PARMINGGUON & ULAON NA BADIA

DI HAMAMATE NI TUHAN JESUS KRISTUS

HKBP BENGKULU,  JUMAT, 06  April  2012

 

  Pangaradeon:………[ Song Leader ]

  U:      Hamu angka dongan tinobus ni mudar ni Kristus!  Sadari on ma ingotonta siak ni bagi na tinaon ni Tuhan i laho paluahon hita sian dosa i. Ibana do Birubiru ni Debata na mamorsan dosa ni sandok portibi on, antong paingotingot ma Ibana na manaonhon parsilangon i. Marende ma hita! 

01.  MARENDE, No. 83: 1 – 2          Na lao do Birubiru i.   BL. 214

1. Na lao do Birubiru i, mamorsan angka dosa. Ni nasa hajolmaon i di benget ni rohana. Diporsan do sahitta i, dilehon do dirina i tu tangan ni pamunu, ditaon i do na bernit i, ro di na tos hosana i, didok naeng porsanonku. …Jongjong…

2. Ianggo Birubiru i, ima alealengku. Na paluahon tondingki disuru Debatangku. Didok mandok Anakna i “Sai topot ma pardosa i naung sun  tinoruanku, balga tutu do rimashi alai tarbaen do mombun i horhonon ni mudarmu”

02.  V O T U M – INTROITUS - TANGIANG

U:  Marhitehite Goar ni Debata Ama dohot Goar ni Anakna Tuhan Jesus Kristus dohot Goar ni Tondi Porbadia na manompa langit dohot tano on.

H:  Amen.

        U:   Tongon do angka sahitta diusung Ibana, jala angka pardangolanta diporsan; alai anggo rohanta mandok: Debata do maminsang, mamungkul dohot pasipal Ibana.

H:  [Mangendehon] BE, No, 83: 5                        Na lao do birubiru i     BL.214

5. O Tuhan hinaulimi sai naeng endehononku; Diringku ma peleanmi na naeng seahononku. O Jesus jalo ma au on pasiat ma pamujingkon, baen sangap di Goarmu. Pasahat au tu surgo i, marhitehite mudarmi baen intan di tumpalmu.

U:  MARTANGIANG MA HITA. O Tuhan Jesus! Birubiru ni Debata na mamorsan dosanami. Na jongjong do hami dijolom marningot Ho na targantung i, tangkas do huantusi hami habebernit ni na tinaonmu di dolok Golgata.

H:  Ditaon Ho do sude haleaon dohot siak ni bagi ala ni dosanami. Dibahen i tungki do hami marningot dosanami na manghorhon hamamatemi, asi ma roham urupi ma hami asa gabe upa ni haloajaonmu hami.

U:  Nunga tarsilang dohot hadirionnami na buruk raphon Ho, asa unang be hami mangadop di dosa. Aala ni i sai pargogoi ma hami maralohon roha sibuk, hisaphisap dohot sangkapsangkap ni rohanami laho mangihuthon Ho na mangolu jala na   manggomgomi hami rap dohot Ama i, dohot Tondi Porbadia ro di saleleng ni lelengna. Amen                           [H u n d u l]

KOOR:__________

03. MARENDE, No. 426: 1  - 2          Tutu na mate Jesus i    BL.286

1.  Tutu na mate Jesus i, humophop iba on, durus di hau  parsilang i, mudarna i tongon. Songoni tutu, songoni tutu. Umbaen na mate Jesus i siala au do i.

2. Tutu na mate Jesus i, siala dosangki,. Na lao pasaehon utangki dibaen holongna i. Songoni tutu………

04. PATIK, Gal 5: 24 – 26:

U:  Alai angka na ginomgoman ni Kristus Jesus, diparsilangkon do dagingna rap dohot angka hisaphisap dohot sangkapsangkap.

      H:  Ia dung dipangolu Tondi i  hita, taparangehon ma Tondi i !.

      U: Unang ma taeahi hasangapon na rumar; unang masiasapan manang masilatean!….  Antong  rap mangido gogo ma hita sian Tuhan Debata!

H:  Ale Tuhan Debata, sai pargogoi ma hami mangulahon na hombar tu patikmi.Amen!

       KOOR: Naposobulung

05. MARENDE, No. 78: 1 - 2                       O ulu na sap mudar     BL. 158

1.  O Ulu na sap mudar, binaen ni bugangmi. Na sian jangggar janggar sisungsang duri i. O ulu hatomanon hian do tumpalmi; ditaon Ho haleaon; Ho naeng sombaonki.          ….[jongjong]…..

2. O bohi parsinondang, na sangap situtu. Beasa tung marlangan sap ijur hurummu? Tung aha ma alana, umbaen homur matam? Na mintop do sondangna di na lao tos hosam.

06. MANOPOTI DOSA

U:  Hamu angka dongan, na jongjong do hita nuaeng di jolo ni Tuhanta na tarsilang i. Tatap ma bohi ni Tuhanta parsinondang i hian, nunga tung mardangol, ndang marsahala be, tudoshon bohi ni halak naung hona bura; ida ma sungsang duri na dililithon tu simanjujung ni Tuhanta i,… tiris mudarna i… ima mudar panghophopon i. Aha ma tama dohononmu tu Tuhan i?.

H:  [Mangendehon] Ende, No. 78: 3 [diendehon angonangon, huhut diauhon]

3. Au on tama O Tuhan, manaon na tinaonmi.dosangku do diporsan Ho na tarsilang i. Sai tatap ale Tuhan, au na dijolomon, huhut sai patuduhon basam tu rohangkon. 

U:  Ida ma bohi parsinondang i, na sangap jala marmulia hian, nunga tung marlangan… nunga sap tijur bohina i, modar sude dagingna i…Molo di auhon ho angka na paet, na mangonai dompak Jesus i; nda patut ma paundukonmu bohim di adopanna sadari on, huhut mangendehon: O bohi parsinondang na sangap sutu, beasa tung marlangan sap ijur  hurummu?.

H:  [Mangendehon] Ende No. 78: 2  [diendehon  satonga soara]

2. O bohi parsinondang, na sangap situtu. Beasa tung marlangan sap ijur hurummu? Tung aha ma alana, umbaen homur matam, na mintop do sondangna di na lao tos hosam.

U:  Bereng ma angka dongan tanganna na sai mamasumasu i, asa malum be sian angka sahitna. Ida ma dohot patna na dua na sai ringgas mardalani mamboan barita na uli i, nunga angka dotdot pataontaon ala ni hansitna binahen ni pangalinsingi i.

        …Organ  angon angon… Song Leader  mangendehon : “O Ulu na sap mudar…

U:  Ale Tuhan Jesus naung mate tarsilang humophop hami, sian roha na magopu ro do hami nuaeng tu jolom  mangarsakhon dosanami, huhut mangido hasesaan ni dosanami; tung unang tulak hami…sai tangihon ma tangiang ni sude na pungu on;

…Ganup martangiang mangido hasesaan ni dosana be …

…SL:  Mangendehon] Ende No. 78…

U:  Hamu angka dongan! Ndang tarasam balga ni holong ni roha ni Debata na tu hita. Tongon do angka sahitta diusung Ibana, jala angka pardangolanta diporsan. Ala ni pangalaosionta Ibana tartullang, binahen ni hajahatonta Ibana mabugang. Ampe tu Ibana pinsangpinsang parhitean ni hasonanganta, jala ala ni bugangna malum itahilala… Ahu ma mandok di ho; nunga sesa  angka dosam... Antong unang ma dosa i mangaraji dibagasan dagingmuna na olo mate i, mangoloi hisapna.

H:  Dihaporseai rohangku do mudar ni Jesus na durus di dolok Golgata ima naung manesa saluhut dosangku.

U:  Antong ala naung sesa dosanta dibahen mudar ni Tuhanta, pasangap ma Ibana ollat ni on, ro di saleleng ni lelengna.

H+U:   “Hasangapon ma di Debata na di ginjang”. Amen.            [Hundul]

07.  KOOR; Ina Par ari Kamis

08.  MARENDE, No. 471: 2    Hupillit Jesus donganki

2. Arga ditobus tondingki, na mate do Ibana. Ngolungku hubaen upa ni, lao mangoloi hatana. ;:;Di Ho ngolungku, ro di ajalhu, Jesus di Ho au mate mangolu;:;

09.  MANJAHA EPISTEL, Psalm  44: 18 – 27      [ Ida Bibel ]

10.  KOOR: Ama Haleluya

11.  MARENDE, No.   449: 2,  3         Sai solhot tu silangmi

2. Lao ma au tu silangmi, i haporusanku. Sai asi ma rohami unang tulak ahu. Silangmi Tuhanki ima pujionku, paima sogot sahat au i endehononku .

………. Jongjong…….

3.  Domu ma tu silangmi, ima tioponku, asa unang lilu au, Ho ihuthononku. Silangmi...

12.  MANGHATINDANGKON HAPORSEAON.

U:  Hamu angka dongan! Ari parningotan di panaonon ni Tuhan Jesus do sadari on humophop hita. Na gabe hagogok ni pelean do Ibana bahen pardengganan tu Debata laho manggarari utang ni dosanta.

H:  Marhite poda on, taondolhon do na holan sahali Jesus tarsilang laho manghophop jolma i, ala ni i tatulak do poda na mandok: adong haluaon na asing sian naung pinatupa ni Jesus, jala tatulak do poda na mandok na adong dalan na asing mandapothon Debata asing sian Jesus, songoni nang poda na mandok boi ulaon na denggan pinatupa ni jolma mamboan ibana tu haluaonna.

U:  Antong tahatindangkon ma haporseaonta i, songon na hinatindangkon ni donagnta sahaporseaon di sandok portibi on, rap ma hita mandok:

U+H:         Ahu porsea di Debata Jahowa ………..                                   [hundul]

13.  KOOR: Parhalado & Keluarga:           Ho do Rajangku.

14.  SUNGGULSUNGGUL;

15.  KOOR: Ama Agape

16.  MARENDE, No. 84: 1 ---             Aut na ginorga tu rohangku     BL. 195

1. Aut na ginorga tu rohangku, bohim di na lao mate Ho. Aut na huingot O Tuhanku tongtong panghophopmi di au. Ai Ho do paluahon ahu, dosangku do pinorsanmi; didaoni Ho parsahitonku, martua au binaen ni i.

2. Sai jalo m’au ale Tuhanku, baen upa ni na tinaonmi; sai naeng ingoton ni rohangku tung sasude na binaenmi; humophop au pardosa godang, dibahen holong ni roham; hinorhon ni tarbaen au sonang lao mandapothon banuam.…O r g a n …

3. Mauliate ma rohangku, di Ho O Jesus Tuhanki. Ho naeng tongtong haholonganku, marningot denggan basami. Antong sai tiop ma tanganku, manogu au tu lambungmi; dijalo Ho do tangiangku; sai pos do rohangki disi.... O r g a n…

17.  EV: 1 Kor. 15: 1 – 3    

18. MARENDE, No. 412: 1 —     [Huhut  Pasahat Pelean) BL.387

1. Ndi di dolok adui, silang ni Tuhan i, sap mudar sap tijur do i. Jesus mate disi, asa malum dibaen, sude angka gondok roha i. Ref. Dibaen i tung holong rohangki, mida silang di Golgata i, hupasolhot diringku tu si dompak surgo pardalanan­ki.

2. Dileai jolma i silang ni Tuhan i, hape haluaon do i. Nang godang dosangki, alai sesa do i, dibaen mudar na durus disi.. Ref. Dibaen i… [Organ]…

3. Na mabaor sian i mudar ni Tuhan i, na tau paiashon au do i. Tung na bernit di taon, Tuhan Jesus disi, paluahon sude hita on. Reff. Dibaen i tung holong rohangki.….[Organ]……

19. PANGARADEON TU ULAON NA BADIA. (Ende, terlampir)

20.TANGIANG PELEAN, ALE AMANAMI, PASUPASU, AMEN.    
                                                                                                                      Gr. Abdul Rachman Sitorus